Song Lyrics

En Naach wie manche isch lieje wach
Ne blasse Mohnd am Chlodwigplatz brems en Strooßebahn
Kaum ze gläuve dat en Stadt wie die he och ens still sinn kann
Bloß do es ne Film en mir un dä läuf immer widder vun vörren ahn
Ohne Handlung Hauptdarsteller
En dämm Film ess jeder Statist
En nem Tunnel dä Zuflucht heiß
Doch nur en janz billije Endstation ess

Ruude Teppich vüür der Rezeption
Un dohinger wie'n Flunder su flach steht ne Zinnsoldat
Dä singe Text joot drophätt doch dä kennt mer schon
Mer weiß bloß nit ob vun nem Steckbreef oder nem Wahlplakat
Paar Schritt wigger läuf russisch Roulett
Für Schutzengel die arbeitslos sinn
Dä Revolver dä rundjeht ess secher
Denn do sinn sechs Kugele drinn

Weed et niemieh hell em Parkett?
Saach ess schon alles ze spät
He en dämm Bahnhofskino?

Et jeht e Drohtseil vun nem Minarett
Bess zo nem Dom dä als Parkhaus verkleidet de Luff ahnhällt
Drop balanciert e leer trojanisch Pääd
Wat soll dat? brüllt et noch et et en Zeitlupe runderfällt
Et weet em Namen des Volkes verwarnt
Uun nem Henker dä veitsdanz un tobt
Einfach falle wöhr unverantwortlich
Mer sööße all em selve Boot

Einstein dä em Schatten vun ner Bomb
Rotz un Wasser flennt weil och he keiner ihm nöherkütt
Un ihm beim Kreuzworträtsel hilf beim letzte Woot:
Afrikanischer Fluß mit drei Buchstabe- fingk er nit
Vun Berg Sinai kütt övver Fernschreiber
Jetz jraad et elfte Jebot
Während Dürer die apokalyptische Reiter
Noh Zahle buntmohlt

Castaneda Karl May Brecht Wilhelm Busch Chuck Berry un Fritz Lang
Pokern öm et Patent vum Perpetuum Mobile
Dä ewije Verlierer waach alles setz op Null un spreng die Bank
Et räänt Petrodollar Silberlinge Lire Yen Peseten Drachmen
Un Deutschmark die allesammp nit koscher sinn
Denn op all dä Münze ess Janus drop
Dä ävvens enttarnt woot als pawlowsche Hungk
Jed zweit Hummelfijürche drieht durch
Un mäht och noch zo jooderletz Stunk

Uss Verzweiflung setz sich Aga Khan
Singe joldene Schoss en ner Nische wo 'n keiner sieht
Un schrief met Leppesteff Midas ess bloß ne Scharlatan
Op die Scherve vum Spiejel en der Präsidentensuite
Buster Keaton laach sich halv kapott
Weil en immer noch kein Sau versteht
Denn dat Leech do ahm Eng vun dämm Tunnel
Ess en Panoramatapet

Dä Morje es grau do schlööfs en mingem Ärm
Dinge Odem jeht ruhig die Turmuhr schläägt fünfmohl ahn
E Nebelhorn vum Fluß her noch relativ wigg entfernt
Wie 'n Fanfare zum nähxte alltächliche Babylon
En dämm Fortschritt Zerstörung bedück
Dat sich affingk met jedem Verlust
Hätt dat Kind en dir wirklich nur'n Changs
Wie se 'n Schneeflock hätt Mitte August?

Manfred Boecker, Alexander Buechel, Jan-christoph Dix, Klaus Heuser, Stephan Kriegeskorte, Wolfgang Niedecken, Hans Wollrath

The duration of Bahnhofskino is 6:44 minutes and seconds.